كيف تصبح رئيسا للجزائر

اولا : ان تكون شخص طبيعي اي لك اصل شرعي و مقر سكن ، شهادة ميلاد و طلب خطي و كذا صورتين شمسيتين  اي كاتب عمومي يمكنه ان يكتب لك الطلب الخطي و هو سهل لغايه  تقوم بتقديمه الى الوزارة المكلفه بعدها تجمع 60 الف توقيع بداية من الاحد يتم استلام قسيمة الترشيح و يعطى كل مرشح 150 الف قسيمه ادي هاربل معاك ولا 404 باشي

المطلوب جمع 1500 امضاء في كل ولايه و اكثر شيء 5000 امضاء على ان يفوق عدد الولايات 20 ولايه

كما ان هناك توعان من هذه القسيمه اذ انه و فيحالة ما اذا كان صاحب القسيمة منتخبا في مجلس بلدي او مجلس ولائي رايح يكون امضاءه يساوي 600 امضاء من اي مواطن عادي ... حتى فالامضاء و هوما يسواو و انتوما لالا

يعني اذا تعرف 5 منتخبين في كل ولايه تقدرو توفرو 3 الاف امضاء في 25 ولاية تفوت 60 الف قسيمه ...

و لي يدير هادو ليزافير هوما البزانسه تاع الانتخابات ،القسيمة من عند مواطن عادي يتباعو بالكيلو قال 100 قسيمه ب500 الف

وهادي جيهم غاليه بزاف ويتعبوا فيها .على هاديك يروحو للمنتخبين بحيث يعطيه زوج ملاين يمضي له على لاقسيمه لاي مترشح ان شاء الله شارون هات برك زوج ملاين

المعرفه هادي لي تاجر بالانتخابات على راسهم خصوصا في وقت بوتفليقه عاد الغاشي كامل يتاجر فالانتخابات المهم كاين بزناسه رفيعي المستوى و كاين لي عيانين تاع قسيمه و خلاص ...

انت تروح للجماعه لي فور لي يطيرو فالسياسه و يعرفوا كل كبيره و صغيره ، يلعب لعبته بمعارفه و يجيب لك القسيمات في زمن قياسي و يخلط منتخبين و غاشي باه يدير لك الاشهار و يركز على القسيمة العاديه ...

كيما الناس لي دارو الحمله لطالب ابراهيمي و جمعوا له 200 الف قسيمه من مواطنين عاديين مبصح رفضوه قالك عاصفه قلبت الشاحنه لي كانت رافده الامضاءات و داهم الريح  بلادكم مقوده صح

و كي تجيب القسيمات نروحوا للعب لخشين ، الصحاح لي يخيروك تكون رئيس ولالا ؟

نضرب مثال : الانتخابات الجايه كاين رباعين غير يشوفو مع القسيمات تاعو يقول واحد لصاحبو الفايح هذا مزال يصحح في وجه ؟ ارمي علينا الزبل

يشوفو عبد الله جاب الله يقولو منعرف بيت الدعاره تاع سكيكده مزال يخلص عليه ولا تاب و فتح بيت دعاره في دراريه ؟ ارمي الزبل

يشوف بن بيتور يقولو وضرك هذا قاعدكي القطه لي تحشم يصلح رايس ؟ ما تتمسخروش بينا حنا شعب فوايوات لازم رئيس فوايو معليش خليه نديروه ارنب سباق باه تحلى شويه

و انت باه يخيروك اخرج لهم من المجتمع المدني سودار و حاب يولي رئيس بطال يحوس يولي ريس او كوردوني حاب يولي رئيس و تحيه لكل هاؤلاء ...

يضحكوا عليك شويه و يشوفوك جبت الامضاءات يقولو و الله نفوتوه قدام المجتمع الدولي باه يقولو عندهم ديمقراطيه ، يقولو صاحبو ولوكان يديرلناكي الفيس ؟ يقولو عين مقل و رقان مزالو كاينين و الرصاص ما عطى ربي غير هو ديرو خليه يصرح

انت تفوت معاهم و يوافقوا عليك و تصبح في عالم اخر تخلص 3 اشهر مبلغ محترم يضخوا لك 6 ملايير فالكونت تاعك و الغريب في الامر انهم يشترطو السي سي بي ؟

و سياره رباعية الدفع بلاندي و زوج يعسوا عليك و متحدث رسمي و كلش مفتوح ليك الاذاعة التلفزه الكارطيات الملاعب دبر راسك برد قلبك و قول وش عندك

وكي يخلاص الشهر تاع الحمله و تلقى غير صوتك انت برك وواحد ما داهافيك هاك عشت شهر فالفخفخينه و تقلشت خلصوك في 3 اشهر و زياده فوقهم قطع ملاير ماشي السته كاملين او لازم تفرني شويه

اذا الناس فوطاو عليك و كنت فحل و كلاسيت على الاقل الثاني ولا الثالث يخي خلاص ثم تنسانا و تولي من اصحاب الكروش و ربي يحشرك معاهم في جهنم ما فيهاش