خاوتي و احبابي لازم علينا نفيقو

مليح تفرحوا لرياض محرز، وتهتموا بمهازل شكيب خليل و سلال و الحكومة الفاشلة تاعنا، و تتبعوا دوري أبطال أوروبا و تتناقشوا بعد المباريات و و و و و ......
و لكن لازم الإنسان يدرك الأولويات في الحياة، و الأمور اللي لازم يعطيلها الوقت بزاف في حياتو لأن الحياة قصيرة بصح غالية، الأمور المهمة و اللحظات الحلوة لازم نعيشوها و نستبنوها، و الحصيلة تاع الخير و الفايدة لازم تكون ثقيلة ...
المهم، في الوقت اللي رانا عايشين فيه، هناك حرب إعلامية كبيرة و عظيمة ضد الإنسانية، مهما كان الأصل و الدين و الإنتماء، هاذي الحرب هي حرب باش يقتلوا الضمائر، حرب باش يغطوا البصائر، حرب باش يبعدوا الناس على الأمور الجواهر ...
الهدف يا خاوتي راهم حابين يخرجوا الإنسان من الإنسانية تاعو، يجردوه مالمبادئ تاعو، ينحيولوا الأحاسيس و العواطف تاعو، و يرجعوه يعبد الدراهم، حياتو كامل و هوا يجري باش يدير الدراهم و يصرف الدراهم و يخبي الدراهم و يخلي لولادوا الدراهم و يحسب الدراهم و و و و و ....
مايهموش واش راه صاري لخاوتو ، لجيرانو، لحبابو، لولاد بلادو، الاهم هو يعيش لاباس بيه و أخطي راسي
المستفيد هو شكون ؟ شكيب خليل ؟ لالا هذاك إنسان حشاوهالوا هو ثاني، كان ضحية موت ضميرو و ممبعد حلاتلوا المعيشة بعقلية نفسي نفسي و أصبح إنسان مذنب و خربها.
شكون في رايكم ؟ سلال ؟ عايلة بوتفليقة ؟ هاذوك كامل حشاوها لعمارتيهم كيفاش يقابلو المولى عز و جل ! أنا يغيضوني و الله يا خاوتي نساو مبادئهم و ضيعو رواحهم ...
المهم نجاوبو على السؤال ! المستفيد هم بارونات و اسياد الإقتصاد في العالم اللي دارو النظام الرأسمالي اللي يهدف إلى إثراء الأثرياء، يزيد الماء للبحر، و جعل الفقراء عبيدا من نوع آخر، الفقير حياتو تتقيد بالخدمة، الإنتاجية لازم تزيد، المرأة يمنعوها تتزوج و دير الذراري، باش ما تروحش عطلة أمومة علاش ؟ باش ما ضيعش الدراهم للشركة ....
ما كاين لا الماسونيين لا عباد الحمير لا عباد الريح، يعبدوا واش يعبدو يدبروا راسهم، المهم و الأهم يربحوا الدراهم، و يديرو كلش و كلش باش يزيدوا يترفحوا !
الفايدة يا خاوتي من الهدرة هاذي، ما لازمش ننساو رواحنا حنا ثاني، لازم كل حاجة نعطيولها وقتها على حساب أهميتها، لازم نحوسوا على المعلومة برواحنا مانخليوش الإعلام يصورهانا كيما يحب !
اليوم رانا ضحايا، غدوة ننساو مبادئنا و أهدافنا في الحياة، و نولو نقولوا : ما تنصح ما والو ! ما دخلشك روحك هاذي حرية شخصية، كول واحد يدير واش يحب مام تشوف بلي منكر ما تنصحش ! La liberté Rak Fahem
المعريفة ؟ الرشوة ؟ ... نتا مريض ؟ يا و هاذيك قفازة يا الجايح نتا اللي ما فهمتش !!!
المهم، بلعقل بلعقل رانا نوليو مذنبين ماشي ضحايا راك متبع الحكاية ؟ هاذي ماشي غير في شكيب و سعيد و سلال و و و و ... ياو الشعب راه ياكل في الشعب ، الشعب راه يسرق الشعب .....
بعد عشرين سنة يطلع شكيب جديد، هو كان يسب في شكيب بكري، غدوة من غدوة يطلع سلال جديد، وزير يحب يتمهبل باش يضحك الشعب علا خاطر اليوم في القسم راه يتمهبل و ما تبعش الدرس و ما قرا ما فهم .
المهم خاوتي، لازم علينا نفيقو و نرجعو للفطرة تاعنا و سبب وجودنا غهاذ الدنيا قبل ما نول حنا مسؤولين على إخفاقنا.
اللهم اشهد أني بلغت !
الله يهدينا و السلام عليكم و رحمة الله و بركاته.

ي . أنيس