من اين ابدأ...مهزلة الجزائر أن اللصوص يحققون مع الحرامية

- صحاب الكاشير اللي دوروها لحم لغزال و أنتقلو من لحيس الصباط مسيرج إلى لحيس الرونجورص بالطين

- فئة كبيرة من المعارضة و اغلب الأحزاب و السياسيين لأنهم يريدون حل الإنتخابات فهناك من يطمع في الحكم او بلاصة في الحكم و هناك من يريد المشاركة من اجل ربعة دورو و الكل يعلم بان مرشح القْايد هو اللي يديها.

- حبابي و اعزائي les islamistes يقدسون la caserne اعداء الديموقراطية و إنتهازيين، واش جيك من واحد يستعمل الدين تعو على جال السلطة و المال! هل يجيك الخير منو ؟ مستحيل.

- النوايا اللي حشاتلهم الشروق.

- الناس اللي تعشق فالكاسكيطة و ماتفرقش بين المؤسسة العسكرية و الديناصورات التي تستعملها، تلقاهم يا إما في الجيش يا إما عندهم فرد من العايلة فالجيش و تبانلهم كي مايقبلوش القايد شغل ماقبلوش ولدهم و الجيش خاوة خاوة.

- الناس اللي تحشاتلهم بلي الجيش هو الشعب و الجيش هو القْايد معنتها الشعب هو القْايد.

- الملهوفين اللي حابين يبنيو دولة قانون في ربع ساعة مع جاهم الحل تع القايد زربو اصطفو وراه باه يتهناو من المسؤولية التاريخية كمواطنين و كون تقولهم هدا ماشي حل يقلقو منك.

- الناس اللي تحشي لروحها و تقول نستعملو القايد باه يروح بوتفليقة و من بعد ندورو على القايد، هدو جماعة مراد عالم دار و افلام mbc action شغل صطارطيجيك، يضحكوني شغل عندهم télécommande يتحكمو بيها فالقايد.

- هاديك اللي تقولك الجيش خط احمر إحتمال كبير خاطبها كابران و خايفة ماتتزوجش تقولك تتخلط.

- هدوك اللي يشتيو لحكايات تع وقت الإرهاب و نعرف كومندو قالي كدا، و كي يشوفو الكاسكيطا يترعدو و تلقاه خاسر في حياتو 76 مليون فقط باه يخلص لعشاوات للجادارمية تع المدينة تعو و كي يجيو لعرسو و يضربو بالسلاح يولي يضحك من عينيه و يشوف مع صحابو شغل راك تشوف.

- هدوك اللي يامنو بنظرية المؤامرة و يستناو في حفتر يزضم عليهم كما شقيف من الشرق.

- هدوك اللي مع يسمعو كلمة فرنسا يتفكرو علي موت واقف كون تقولو الشاب نصرو قاهر ليليزي يأمن و يربي عليه الكبدة، حشاتلهم الشروق كي قالتلهم القايد عدو فرنسا.

- هدوك اللي عاونهم كانش إطار فالجيش باه يلقاو خدمة و تحشاتلهم بفكرة القْايد هو الجيش حتى و لو علابالهم يبقى يأنبهم الضمير.

-هدوك les vieux اللي تلقاهم فلعراس دايرين بالكولونيل و كي يدير blagues ماتضحكش يخراو بالضحك.

-هدوك اللي يشتيو الفيلمات تع الحرب و تلقاهم يعرفو يحكيو على المواضيع التي تخص : الميقْ و صفقات السلاح و بوتين و يشتيو افلام Arnold و كي يعود الرشاش يخبط يقولك علابالك هدي شحال تيري فالثانية؟

الحقيقة ديما تكون توجع و عذرا لتكسير أحلامكم السينانيّة ترخفو روحكم تلقاو روحكم تحت حكم طليبة.

المهم اني كتبت بزاف و قادر نزيد لكن  اتهلاو

ديدين بريك يقصف